راح علي الفاضي

اكتر حاجة توجع في لحظة الفراق حبيبك تلمحه و دموعه رافضة تطلع
وكأنه حالا فاق علي ايد بتدبحه
وكأن ده عادي لا و اقل كمان من العادي
و الوقت ده كله في عمر الواحد راح علي الفاضي
و مابين لقي وفراق كاننا في سباق ده بيبكي وهو مفارق و ده فارق و ماهوش فارق
مين فينا وفي بوعده ومخانش الاتفاق و اتبقي في مطرحه

الساحر سارق الكحل

صاحب العمل لدينا وهو قاهري جدا له وجهة نظر غريبة تتلخص في ان كل الاسكندرانية يصعب التعامل معهم لاسباب عدة و لكن اهمها ان الاسكندرانية سحرة من الممكن ان يسرقوا الكحل من العين وهذا ابسط اشكال السرقة من وجهة نظري و لكنها اخطرها من وجهة نظره و لا يمكن ان تتخيلوا شكله او ملامح وجهه حينما يتحدث عن سحرهم و كأنه واقع فعلا تحت تأثيرهم بل الا دهي من ذلك انه حينما يثق في احد يحذره من الوقوع في سحرهم و يصرح بانه ايضا فعلا مسحور بهم ولك ان تتخيل حينما يقول لي ذلك فانظر اليه ضاحكة ازاي يا افندم ماانابرضة اسكندرانية فيقول مش عارف ازاي

سلسبيل

ما اجمل الحب لما يكون علي الطيب
يشبه الورد الندي و المسك و الطيب
ومراكب الود سايرة تود علي الطيب
الدنيا فيها ردي و فيها كتير طيب
ازرع جميلك و لا تندمش علي الطيب
اوعاك تعاشر لئيم و تقول عليه طيب

كلما قرات هذه الكلمات وجدتني اتذكر بنت خالة امي طنط سبيله اسمها الحقيقي سلسبيل كانت غاية في الطيبة و الوفاء لامي كلما تذكرتها اترحم عليها و علي ايامها

ساعات بطعم التوت

ادي السنين بتمر
و الحلو جنب المر
بابص فجاءة لقيت حرامي سرق العمر
ادي السنين بتفوت ساعات بطعم التوت
و ساعات شجر بلوط فوقه غراب بيقر
ليه يا غرام متحاش فايته السنين مابقاش
بعنا الحياة ببلاش و الشاري دائما حر
شفت القمر يا جميل نوره علي بخيل
اديني لام تعليل و اللام ده حرف يجر
اديني اي ردود شوقي ملهش حدود
ولا انت مش موجود و الحب شئ بيضر
من قراءاتي

المراكبي

اضحك للشمس وللضله
و افرح بالكترة و بالقلة
لو وقفت مركبتي السايرة
حانزل ادورها بمنفلة
انا باعشق بحري و مركبتي
و اغمز للسنارة حبيبتي
و السمكة بتضحك علي خيبتي
واذا رقص الموج نرقص شلة
صياد علي باب الله حالي
و بيبان السماء اهي فاتحة لي
انا شفت في سفري و ترحالي
كل الاقمار كانوا اهلة
الرزق يا عم علي الرزاق
حيهمك ايه لو زاد اوضاق
ربك بيقسم كيف يشاء
و عبيط اللي يعيشها بذلة
الشمس تقوي لي دراعي
و الضلة تمشي لي شراعي
و الضحك بيغلب اوجاعي
اما التفكير بيجيب علة



هي جاية الشهر ده معايا بشعر و امثال و حكم قراتها فاستمتعوا معايا باحاسيس جميلة لناس اكيد وقت الاحساس ده كانت جميلة

كن .......... ارجوك

كن بلسما ان صار دهرك ارقما
وحلاوة ان صار غيرك علقما

بهية

يسبق كلامنا سلامنا يطوف علي السامعين معانا
عصفور محندق يزقزق كلام موزون و له معني
عن الارض سمرا و قمرا و ضفة و نهر و مراكب
ورفاق مسيرة عسيرة و صورة حشد
و مواكب في عيون صبية بهية عليها الكلمة و المعني
مصر يااما يا بهية يا ام طرحة وجلابية
الزمن شاب و انت شابة هو رايح و انت جاية
جاية فوق الصعب ماشية
فات عليكي ليل و 100 و احتمالك هو هو و ابتسامتك هي هي
تضحكي للصبح يصبح بعد ليلة و مغربية
تطلع الشمس تلاقيكي معجبانية و صبية
الليل جزاير جزاير يم البحر يفنيها و الفجر شعلة حتعلا و عمر الموج مايطويها
و الشط باين مداين عليك الشمس طوافة
ايديك في ايدينا ساعدنا
دي مهما الموجة تتعافي بالعزم ساعة حماعة
وبالانصاف نخطيها
مصر يا امة يا سفينة مهما كان البحر عاتي
فلاحينك ملاحينك يزعقوا للريح يواتي
اللي علي الدفة صنايعي
و اللي علي الجداف زناتي
واللي فوق الصاري كاتب كل ماضي و كل اتي
عقدتين و التالته ثابتة
تركبي الموجة العفية
توصلي بر السلامة معجبانية و صبية

من مربعات ابن عروس

ماحد سالم من الهم و لا الحصي في في الاراضي
لا له مصارين و لا دم و لا هو من الهم فاضي

من مربعات ابن عروس

مسكين من يطبخ الفاس و يريد مرق من حديده
مسكين من يصحب الناس و يريد من لا يريده

من مربعات ابن عروس

قلّل كلامك وخليـــــــك في كل محفل مـــوقــر

واحسن لمن كان يأذيك بالسـوء في كل محضر

***********************************

اللي علي الخير هنيــه وبشره بالغنيمـــــــــه

واللي علي الشر عزيه بكره يلاقي الهزيمـــة

*************************************

كسره من الزاد تكفيك وتبقي نفسك عفيفــه

والقبر بكره يطويـــك وتنام في جارالخليفه

******************************************

ماأشقاك ياشاهد الزور في الحشر حالك يحزّن

ذنبك لدي الناس مشهور في يوم يبان المخــــزّن

****************************************

ماينجدك غير أهلــــك ولاينفعك غير مالــــك

واحلف يمين بعد أمــك حبيب م النسا مابقي لك

***************************************

من يبغضك لم يحبــــــك ولو طعمتو الحلاوه

السن للسن ضاحــــــــك والقلب كله عـــداوه

**********************************************

صاحبت إنسان وعينه للطمـــع فاتحـــــــــــه

بيعمل أطرش وودنه للسمــــــع فاتحـــــــــــه

عن الحلال صام وبطنه للحرام فاتحـــــــــــه

أتاريه مكروه وعلي فعله الخلايق شاهــــــــده

بينضح المر ولاعمره بينضح شهــــــــــــــــد

ومهما احترمته وأكلته المروّق شهـــــــــــــــد

خوان للعهد ولايقرا معاك فاتحة

*******************************************

نصحتك ما اتنصحــــت والطبع فيك غالــب

وديل الكلب لم يتعــــــدل لو حطوا فيه قالــب

********************************************

صابونة العدو ماترغيــــــــش وإن رغت ياللا السلامـــه

إن قعدت في مطرح ماترغيش حتي تقوم بالسلامــــــــــه

****************************************

زلة لسانك تسقطك من عين كل أهل كمـــــــال

واعــــلم بإن الرجال مابتتقلِش بمــــــــــــــال

لو كنت تقل الجبال ع الأرض ماتعلـــــــــــم

***************************************

الندل له طعم مالـــــح وله خصايل ذميمـه

القرب منه فضايـــــح والبعد عنه غنيمـــه

******************************************

في الندل هات العصا العوجه وانزل دق

اكمنه تعبان انزل فوق دمــــــــــاغه دق

ماعرفشي طعم الشرف ولا حتي طعمه داق

لابينفعك في الشتا ولايكرمك في الصيــــف

شاطر في أكل الحرام زي اللهيب في السـف

تملي سقعان ومكرمش في عز الصيـــــــف

ولاتلتقي ضيف علي بابهم في مــــــــــره دق

*********************************************

طبيبي بالعجل إ لحــــــق هات لي دواك الموافقفيه

ناس كتيربتعرف الحق

/ ولجل الضرورة توافق

******************************************

كل عيشك بملحك وفجــلك وعيش عيشـة جدودك

واتمد علي قد رجلـــــــــك بلاش تزيد عن حدودك

***************************************

لاأنام علي الشوك عريان

واصبر علي ماجرالي

واصبر عليك يازمــــــان حتي ينعدل حـــالـــــي

أمش علي الشوك حفيان

وأضحك مع اللي جفاني

وأصبر علي ظلم الأيام لمن ينعدل زمــــــــــاني

النار بين ضلــــــــوعي وأنا غريق مدامعـــي

كأني فتيلة قنديــــــــــــل أمـوت حريق وغريق

***************************************

من مربعات ابن عروس

أنا باوَحِّد اللي خلق الناس خلق مسلمين ونصارىوناس نامت على فَرش وِْناس
وناس علي المعايش حيارى

***************************************
طبيب الجرايح قوم اِلحق
وهات لي الدوا اللي يوافقفيه

**********************************************
ناس كتير بتعرف الحق
ولاجل الضرورة توافق

**********************************************
فَرَطت قِلعِي ما جانيش ريح
وعاودت ع البَر ناوي
ياما ناس زيِّنا مجاريح
لكين صابرة ع البلاوي

*********************************************
سكت الهَوى والناموس طار
والسبع طاطا بعينه
خليه دا النومِ أستار
لما الكلب ياخد يومينه
شوف الزمان انتهت عَدَليه
وادي البُطْل ع الحق راكِب
جه السبع يُطلُب عدليه
لَقَي الهِلف ع التخت راكب
يا قلبي إوعى تعاشر الدُون
ولا تكلِّمُه بالاشتراحة
تكلمه الكلامِ موزون
تلقاه يرد بقباحة

****************************************
جاني طبيبي مع العصر
وف إيده ماسك عصاية
اتاري طبيبي قليل أصل
من خصمي جابلي الوصاية
كلام الغَرَابا حِمِلناه
فات علينا كما ريحها
وي
كلام القرابا إخ منَّاهوياجي فوق فرش الكلاوي

***************************************************
إوعى تقول للندل يا عم
ولوكان على السرج راكب
ولا حد خالي من الهم
حتى قلوع المراكب

*****************************************************
ولابد من يوم محتوم
تترد فيه المظالم
أبيض على كل مظلوم
أسوَد على كل ظالم

****************************************************
غربي بلدنا بلد سيح
وادي الهِلف ماشي ورانامش عيب كراسي التماسيح
تقعد عليها "الوِرانا"؟*
***************************************

خشب المراكب من السنط
في البحر ياخد مهاجه
واجب ع الحر يلزم الصمت
لَمَا الهِلف ياخد مهاجه
******************************************

سعد الايام

ان صادفك سعد الايام وانت علي النحس ديمة

اضرب عصاك لقدام عوجة تلقاها مستقيمة

طالع نازل

اكثر ما ضايقني اليوم في العمل بعد عدد من المضايقات او الاختلاف في وجهات النظر انا لم اتضايق فعلا مطلقا من المشكلات ولكن اكثر ما ضايقني ان جسمي لم يكن علي نفس مستوي روحي او عقلي لقد خانني و نزل الضغط و جالي هبوط شديد و انا بالرغم عن ذلك مصرة انني لم اتضايق بالمناسبة استمر هذا الهبوط طول اليوم مصاحبني لليوم التالي و من حسن الحظ انني اليوم التالي اجازة

احنا اجدع

بالرغم من وجود هذا الاحساس الذي شعر به هذا الرجل الواقف بيننا يعطي للبحر وجهه و يويلينا ظهره وان الامر اصبح بين الناس و الحكومةو كانه مترجم لما يشعر به وان الامر بدون فائدة الا انه وبالرغم عن مباركة الحكومة و سرورها و شريفها و عزها و نظافتها و فوق ده كله جمالها الا ان

خلاصة الامر ان احنا اجدع

يوسف في قص و لزق

لو العيب فينا تبقي البلد دي ما تفرقش عن بلد تانية
ولو العيب في البلد يبقي مش عيب ندور علي بلد تانية

الحلو اسكندراني

صور من مدينة الاسكندرية بعدسة محمد فتحي زميلي في العمل

الجانون

عندما يكون بيت الحاكم هو القانون فانه لا جدوي من دراسة القانون

شوية رومانسية

THe End

سارحل لابحث مرة اخري عن الايمان الذي كان يملاني في ايام الجامعة

عن الايمان الذي عرفته معك و الذي كان يملاني

سارحل لابحث عن الايمان بالنهايات السعيدة

استاذي العزيز ... شكرا

رأيتها مرة امام المكتبة في الجامعة تتهادي في دلال وهي دلال فعلا فوجدتها تتذكرني باعتباري كنت طالبه لديها و لدي زوجها الاستاذ في نفس الجامعة و تسالني كيف الحال وايه ده انت لبستي الحجاب فاقول ايوه فترد الدكتور لم يكن يتذكرك الا و يقول البنت ام شعر جميل هو لسه جميل فوجدتني اضحك من وصفها لي و اتذكر محاضرات الاستاذ الرائعةالذي عندما حضرنا الي مكتبه اول مرة كأننا ندخل الي المتحف في اول مرة في حياتنا اعتقد انه حولنا الي طلبة دراسات عليا فعلاعندما اخذ يردد علي مسامعنا اننا ليس من المفروض ان ندخل الدراسة فقط لننجح بل لابد لنا من الاستفادة حتي لو لم ننجح و كنت اقول ما هذا الذي يقوله هو الواحد داخل علشان يسقط او فقط يكتفي بالعلم و اتذكر بدايتنا عندما كان يبح صوته و في اخر المحاضرة بعد ان يكون قد وزع علينا نظراته و تساؤلاته يقول انا مليت من هذا المونولوج الا يمكن ان يدور بيننا ديالوج و اتذكر دهشتي من كم التساؤلات و المتاهات التي فتحها علينا و اعتقد انه مرض هذا الذي كان يعترينى وكيف كنت اصاب بهستيريا ضحك مكتوم فاجده ينظر لي مستغربا فيه حاجة يا انسة فأهز راسي نفيا و يتغاضي هو عن هذه الخيبة او لنقول البراءة التي كانت في غير محلها اليس هذا الطف و اوقع .وصدق حدسه فرسبت بجدارة البنت الوحيدة التي رسبت من بين 4 بنات في الدفعة و اعتقد ان هذا الرسوب كان سببه شعري و ضحكي لم استطع ان اظهر في الكليه و اعتقادي التام ان الناس ال ايه عرفاني و فكراني ان انا الوحيدة الساقطة واخذت هذه المرة الدبلوم من البيت و فوت علي نفسي محاضرات هذا الرجل الجميل و نجحت هذه المرة و لكم ان تتخيلوا غروري و انا الطالبه الوحيدة التي نجحت في الدفعة و عند مين عند الاستاذ الذي لا ينجح عنده اي احداستاذي العزيز شكرا انت كنت محطة جميلة في حياتي .

انا كنت عيدك

اول اغنية حب اسمعها و احبها و تتقال لي في اولي جامعة حقوق اسكندرية

تنقص نجوم السما ازيدك الفجر يغرق اخذ بايدك واجمع سواد الالم في عيني

واصب نبض الهوي في وريدك انا كنت عبدك في عز ضعفك

كنت يوم التجلي سيدك واذا كفرتي بسحر صوتي هاغني رغم العطش نشيدك

تنقص نجوم السما ازيدك الفجر يغرق اخد بايدك

و اجمع سواد الالم في عيني و اصب نبض الهوي في وريدك

تموت ايات النغم في حلقي انطق بسر الحياة اريدك

تكتب سنين الخلاص نهايتك انطق بسر الوجود اعيدك

تنقص نجوم السما ازيدك الفجر يغرق اخذ بايدك

واجمع سواد الالم في عيني و اصب نبض الهوي في وريدك

اذا نسيتي هاكون نهايتك و اذاوفيتي هاكون شهيدك

وكل ما ارحل هتكوني غايتي و كل ما ارجع هاكون وليدك

تنقص نجوم السماازيدك الفجر يغرق اخد بايدك

و اجمع سواد الالم في عيني و اصب نبض الهوي في وريدك

مرمر

عندما ارحل عن هذه الدنيا

يقينا اعلم انني سوف ارحل متألمة اكثر مني غاضبة

ولان هذا احساسي فعلا

فانا اوقع عليه
مرمر

المصنع العالمي النووي لرباط الجزم

كلما رايته لا اعلم لماذا اتذكر الفنان عادل امام و هو يصف افتتاح الرئيس في مسرحية الزعيم لمصنع رباط جزم انه رئيس الوزراء احمد نظيف الذي استغرب كل من عرف انه ذهب الي الاسكندريه عروس البحر الابيض المتوسط ليفتتح فرن عيش بلدي + كوبري محطة سيدي جابر الكهربائي انه نظيف في كل شي حتي عقله انه يمتاز بشئ خاص انه نقاوة عين الرئيس .

MY WAY

هل سمعت اغنية سيناترا i did it my way عندها اشعر انني لم دد ات ماي واي بل هيز واي, شيز واي, زير واي, اند يور واي, اني اذر ون واي but not my way

ياعروستنا

يا عروستنا يا لوز مقشر تعالي
ياعروستنا و ايه عرفك يا العريس
بليلة حنتنا بتنا سهاري و بات
الورد صحبتنا ومية العطر جت
رشت ما بلتنا بلت هدوم العريس و بس
وهدوم عروستنا
يالوز مقشر تعالي

الغيبوبة

ماذا تفعل اذا كنت في غيبوبة وبالطبع هذه الغيبوبة غصب عنك
حوار دار بيني و بين زميلي في العمل منذ فترة ليست بالطويلة كان هذا اول او ثاني عمل له و كان كلما شاهد احدا او تحدث مع احد اجد ان اجاباته مقنعة محللة تحليلا سليما ولا اجد غرابة في ذلك فهو خريج سياسة و اقتصاد لكني كنت استغرب تاخره في العمل في مجالات يحبها فاجده ينظر لي نظرة بريئة ويقول انا مش عارف اصل انا كنت في غيبوبة فاضحك انا منه و اقول له مستغربة يعني ايه غيبوبة فيرد انه كان حزين حزن استمر معه لعدة سنوات اضاعت منه فرصا جيدة عند ائذ صدقته انا
لانني اعرف ما هو الحزن و مايمكن ان يفعله الحزن في النفس الانسانية
واتملي في كلماته لاجد ان الحزن فعلا مصيدة كما قال جاهين
حاسب من الاحزان و حاسب لها
حاسب علي رقابيك من حبلها
راح تنتهي
و لابد يوم راح تنتهي
مش انتهت احزان من قبلها

صقر الحلواني

الحناوي : الاكل و الشرب ما يغنوش الرجالة عن رجولتهم
انت لبستنا طرح و قعدتنا في بيوتنا يا صقر
حورية : مش انت يا عمدة
مش انت يا عمدة
مش انت اللي تتمسح في السنباطي
مش انت اللي تتداري وراء صبيانك
مش انت اللي تخاف من كلمة حق بنقولها لاول مرة
انت اللي اخترت السنباطي و رجالته
و انت الي لميت حواليك كل قاتل و ابن ليل
وسلمته بلدك و اهل بلدك

وكان الحل انه يلم عبايته و يمسك عصايته ويرحل
اسامة انور عكاشة من مسلسل عصفور النار

الحب الضائع

دائما اكره قصة فيلم الحب الضائع لرشدي اباظة و سعاد حسني لسبب وجيه هو ان ما بين الزوج و صديقة الزوجة لم يكن حبا بقدر ما كان عدم وفاء و دائما اتمني مشاهدة مدحت الزوج في نفس السيارة مع عشيقته صديقة الزوجة و هي تسقط من فوق الجبل لآ و شوفوا البرود بعد ما ماتت صديقة الزوجة المخادعة راجع البيه للمدام و هو حزين متوقعها قاعدة علي نار الشوق مستنياه و علي وجهه امارات الحزن و الاستغراب لان زوجته سوف تهجره ناس فعلا باردة

البوليس الغربي و الحمار

هل رايت كيفيه تعامل البوليس الغربي مع المتهم لابد و ان يقرأ عليه حقوقه خاصة ان عليه ان لا يتكلم الا في وجود المحامي الخاص به و ان اي كلمة سوف يقولها سوف تكون دليلا ضده طوال عمري وانا من هواة مشاهدة الافلام الاجنبية و دائما اري ان هناك فرقا بين البوليس الغربي و خاصة في الولايات المتحدة الامريكية والبوليس الوطني الخاص بولايتنا المصريه شوفت ايديه عندنا ثقيلة ازاي و مهدرة للكرامة ازاي
وشتان بين النوعين النوع الامريكي و النوع المصري
و ارجوك لا اريد ان اسمع الجملة الحوارية المعتادة ان كل مهنة فيها الجيد و الردئ او الحلو و الوحش
اقولك مثل سمعته من زمان
كل شئ يشبه اللي له
حتي الحمار و اللي قانيه

السودوكو

السودوكو لعبة جميلة و اذا عرفت طريقة حلها قد تستغرق كل الوقت فانها سهلة و لا تستلزم الذكاء و لكن علي الاقل بعض التفكير تعلمتها من احد الانجليز حيث كنت اعمل وجدته يقوم بالحجز ووضع علي مكتبي كتاب صغير الحجم مكتوب عليه بالانجليزية العمليات اليابانية و اعتقدت انا انها شئ خاص بعمله كطيار
و لا ادري لماذا سألته عن محتوي الكتاب ففتحه و شرح لي اللعبة التي اعتقدت انا انها صعبة للغاية و لكن بمجرد ان اشار الي رقم و طلب مني ان اضعه في مكانه وجدتني احلها بعد دقائق وجدته راجعا الي يحمل في يده كتاب سودوكو صغير و يقدمه لي كهدية لحظتها نظرت اليه شاكرة و صدقني لو مصري او عربي ما كان ليفعل هذه الحركة الراقية هي بسيطة ولكن مازلت احملها في ذهني دلاله علي ان الكلمة الطيبة صدقة و تبسمك في وجه اخيك صدقة و تهادوا تحابوا .

حكمة صينية

عندما يكون بلاط الحاكم غارقا في الفخامة فان الحقول تغطيها الحشائش و الاعشاب وتفرغ المخازن من الحبوب و يرتدي بعض الناس ملابس مزركشة و يحملون اسلحة حادة و يملئون بطونهم بالطعام والشراب و تصبح ممتلكاتهم اكثرمما يستعملون هؤلاء هم السادة اللصوص
هؤلاء هم من قال عنهم يوسف هم اللصوص الشرعيون في فيلم العصفور
و اياك اعني و اسمعي يا جارة

مفاجأة الحياة

هناك من يقول ان الحياة كثيرا ما تفاجئنا
و النبي ايه
امتي ده
يا ابني الفكرة ليست في المفاجأة و لكن في نوعية المفاجأة يعني المفاجأة كماينبغي ان تكون مش مفاجأة من نوعية بتاع النور و المية و فاتورة التليفون و الوصلة و الايجار و البواب و الاكل و الشرب و العيش و العيشة و اللي عيشنها
مفاجأة كده
من نوعية ان لي عم في البرازيل او في الامارات او حتي في شرم مات و ساب كل ثروته 100مليار دولار لشخصي المتواضع .

قه قه قه قه قه قه

لو سألوك مرة انت بتحب مصر ؟ بلاش كده علشان ما تاخدكش العاطفة زي عمك الهجان السؤال بطريقة تانية ايه اللي بتحبه في بلدك يعني لو ربنا كتب لك السعد و هاجرت بره مصر ايه اللي هتفتكره ايه هي الذكريات و اللي هتجيلك و ايه نوع الحنين اللي هيملاك واي المناطق اللي هتفتكرها في مصر ؟ تعرفوا السؤال ده ليه
من سنة كده او اكثر احنا و خالاتي وولادهم طلعنا زيارة للقاهرة سيبك من الاثار و الاهرامات و الحاجات البلدي دي بتاعة العلامة زاهي حواس و فاروق حسني خلينا مع الهواء و التلوث و الرطوبة و الحرارة الشديدة و الهدوم و هي لاصقة كلها عرق مش ده المهم المهم و احنا راجعين نصنا نوم و النص التاني تعبان و شكلنا كلنا عايزين نستحمي
وسط هذه الاجواء وجدت من يقول و اغلب الظن انها لمياء بنت خالتي مفيش اجمل من الاسكندرية و فجأة العرق الاسكندراني نط في اجساد باقي بنات الخالات ليتفقوا معها فنظرت اليهن و انا في شدة الاستغراب و قولت في نفسي دول جايين منين دول ؟
ووجدتني اقول لهم و النبي ايه ده علي اساس ايه بتقارنوا كده
بالرغم من تفضيلي للقاهرة للحركة الشديدة التي تملاها و لمظاهر الثراء في بعض احيائها
انا مش ماديه زي ما هيظهر من كلامي
لا انا باعشق الرفاهية و الذوق و الجمال و المال و النظافه
واستغربوامن ردي ازاي بتفضلي القاهرة عن الاسكندرية ووجدتني اغرق مرة اخري مع نفسي في حاجة تانيه خالص ايه اسكندرية و ايه القاهرة و ايه القرف ده بتقارنوا بايه و النبي لما تقارنوا قارنوا مع لندن او شرم الشيخ او برلين او طوكيو
انا ولا بلد من دي زرتها و لكن كفايه ان بقالي 100 سنه بيدرسوها لنا من خلال التليفزيون و الدش
اسكندرية ايه و قاهرة ايه ووطن ايه و مناطق ايه اللي فيها حنين و ذكريات
(ملحوظة تعد القاهرة و الاسكندرية من اكثر المحافظات ادمية في جمهوريه مصر العالمية)
اما شرم فهي مسقط راس الولاة في بلادنا
حد هيقول لي امال ايه المعمورة و ايه غرامك بها حقوله دي خيبة ومراهقة انا باحكي عن مراهقتي يا اخوانا مش باحكي عن حالي دلوقت لو باحكي عن حالي دلوقت اقولك لو سمحت قراقيش معاك تاشيرة للندن او بون

احنا

هاتلي صندوق صغير اشيل اساوري فيه ادي الذهب صنعتنا ادي الفضة كناستنا
و احنا من سعادتنا نأخد الفقير نغنيه

اريد ان اكون مسلة في لندن او برلين

في احد الافلام الفرنسية رأت مسلة مصرية فهالني حسنها وسط الجمال المحاطة به من نوافيرو منازل جميلة و نظيفة وشوارع واسعة واسعة واسعة و متناسقة
لست ادري لماذا احسست انا ان هذه المسلة سعيدة الحظ فتمنيت ان اكون مكانها
سوف يكون من الممتع ان اكون مكانها و لكن علي شكل انساني يحوطني الجمال من كل جانب و رائحة الزهور و الشوارع الواسعة و اللون الاخضر يملا المكان و الناس بتلمع من النظافه اكيد سوف انتشي و ازهر انا الاخري هناك مقوله ان كل اناء ينضح بما فيه فلك ان تتخيل اذا كنت انا في هذه الاجواء فماذا سوف غير الجمال و الابداع و قيس علي كده كل شئ و اي شئ

طقم من برة

من غير ما نتكلم في السياسة المفروض علي حاكم هذه الولايه ان يستعين بطقم وزراء من الخارج ليديروا شئون البلاد و الامثلة الداله علي نجاج هذا الاقتراح كثيرة منها علي سبيل المثال لا الحصر شركة اونكس لجمع القمامة في الاسكندرية - و الشركة التي تولت ادارة المترو في القاهرة ومانويل جوزيه المدرب الخاص بالاهلي ولنا ان نري الفرق بين انجازات هذه المرافق و الاشخاص حينما كانت تديرها الشركات الاجنبية و بينها حينما ادارتها الخبرة الوطنية الصنع .
وحتي لا تكون وصمة ان الاجانب قد عادوا علنا ليديروا شئون اللبلاد نظرا لتطورهم الشديد لهذا انا اقترح ان يطلق عليهم اسم مستشاري الوزراء المصريين (واجهة فقط)
والله من وراء القصد.

فروع النور

للشوارع ايضا حظوظ و فيها شوارع مسعدة مثل هذا الشارع الذي يقع خلف شارعنا هو بالنسبة لنا الشارع الخلفي
دائما ما تنطلق منه الزغاريد و الموسيقي تصدح في فضائه و فروع النور و رجالة المزمار الصعيدي الذين يطفوا في الشوارع ليلمحوا فرع نور حتي يطلقوا اصوات المزمار الطبل البلدي الذي تهتز له الاجساد و القلوب ايضا
هذا هو حال هذا الشارع الذي اصبح مركز الحسد دائما
هو شارع محسود من جاراتنا و خاصة شوشو القاطنة في الدور الرابع في بيتنا التي تتمني ان تكون احدي سكان الشارع الخلفي ويظل زوجها من سكان شارعنا لانه مناسب جدا له و لكن يعمل ايه الحاسد في امر الله ربنا كتب للشارع الخلفي السعد عقبال شارعنا الذي هو احمر الخدين صفر اليدين قولوا ان شاء الله

مروحة صيني

صديقتي و جدتها من محبي مراوح اليد الصغيرة صينية الصنع و كان لديها عدد منها فاستغربت منها يمكن لانني لم اري احد ممن اعرفه يستخدمها او يمكن لانني لم ارها الا في التليفزيون قد تكون مروحة كبيرة ريش بيد ا حدي الراقصات او وداد حمدي تهزها بيدها و تقول ارجوك ما تنرفزنيش
و بالطبع كعادتي فسرت ذلك علي اعتبار ان صديقتي هذه ميالة الي المبالغة في كل شئ اذن مش ناقص غير انها تمسك في يدها مروحة
يد صيني
وفي احدي المرات ذهبت الي احد المعارض علي البحر و كان الجو خانق و لحظتها شعرت ان ان روحي بتطلع و ان الضغط بينزل وباعرق و الرطوبة عالية فلم اشعر بنفسي الا و انا اتجه الي بائع صيني و اشتري منه مروحة و لحظتها فقط احسست انها افضل 1000 مرة من ورقة او كراسة ولكنني في نفس اللحظة احسست بجميع النظرات تحمل لي اتهاما بالمبالغة حتي شوية الهواء اشتريت له مروحة اصلك مبالغة قوى لحظتها فقط تذكرت صديقتي .

قلوب تدخلها بشمعة

في الا ول انا تخيلت ان الواحد لو انضرب في وجهه مثلا و انجرح عدة مرات يعني نقول 10 او 20 ضربة في الوجه كيف سوف يكون شكل الوجه؟ اعتقد ان شكل الوجه سوف يكون مشوه و خاصة اذا كانت الجروح لا تلتئم بتنزف
طيب تخيل بقي شكل قلب الانسان يبقي ازاي و هو اللي انجرح ليس مرة واحدة ولا 10بل قول100 مرة ليس من اللازم انها تكون صدمة او كارثة بل يكفي كلمة جارحة او محرجة اونظرة متهكمة او حتي متهمة
القلب الصغير اللي في حجم كف اليد هيستحمل كام جرح و تخيل معي ان هذه الجروح لا تندمل او تلتئم يعني كلمة واحدة و الجرح ينفتح
شوف بقي قلوب الناس عاملة ازاي ما بين جرح نازف واخر من كتر الهموم مكرمش او قلوب جافة او قلب سالك و سهل و قلب تدخله بشمعة من كتر سوادها و كما كانت امي تقول قلوب عليها دروب و قلوب من الهوي تدوب فرفقا بقلوبنا يا ناس .

الحيرة

يعني ايه لما تكون مرتبط اوي بالافلام و مؤمن جدا بالنهايات السعيدة ليأتي واقع العائلة الكبيرة من خال او خالة او عمة ليحطم هذه النهايات و لآقع انا بين افكار رومانسية مهجورة و بين واقع مختلف تماما
كيف يمكن ان تكون انت بين افكار و معتقدات ترسخت داخلك وداخل عقلك الباطن بأن العلاقة بين الرجل و المرأة هي شئ جميل او بمعني اكثر دقة هي الجمال كله من ناحية الاحاسيس و المشاعر و الورد و الشيكولاته و النزهات الخلوية و القمر ياليلي و العطور وبين الواقع الذي نشأت فيه و الذي يدور حول الاكل و الشرب و الايجار و الدكتور و الميه و النور و النقوط علشان هي دين علي الواحد مهما بعدت المناسبات لازم تتدفع و المدارس و رمضان ومصاريفه او حتي الاحاسيس ما بين غيظ و انا عملت كده علشان انت عملت كده و انا قولت كده علشان انت قولت كده
ما بين هذا و ذاك خرجت انا الي الحياة مزيج اكيد متكرر ولكن بنسب مختلفة ما بين الحياة التي اعيشها مع نفسي و خيالي و بين الواقع و بالتالي خرجت لا اعرف كيف اتعامل مع الرجل هل اكون كالافلام الاجنبية اغلتي رايت فيها لانا تيرنر و افا جاردنر واودري هيبورن ام اكون المراة التي اراها في الواقع لهذا خرجت انا عقلي في واد و لساني في واد اخر تماما اتعلمت ان اللي يحب يبقي ضعيف و علشان كده خدي اللي بيحبك مش اللي انت بتحبيه واجدني اتسأل و انا تربية روايات عبير ما ينفعش لو احنا الاتنين نحب بعض و نسعد بعض و ننسي لبعض
يرضي حد كده الواحد يكون كالمزدوج مشاعر فاتن حمامة في فيلم بين الاطلال و لسان هند رستم في الزوج العازب و لن اقول كزينات صدقي في كل ادوارها.

ان طال يا قمر

ان طال الليل علي قد ما طال لابدمن طلوع الفجر

وان طال العمر علي قد ما طال لابد عن نزول القبر

انجحوا ارجوكم

تناولوا الطعام مع منتشين ابتسموا انجحوا
اعملوا- اعملوا- اعملوا
وعندما قومون بانجاز عمل
لا حظوا انكم نجحتم و دعوا الاخرين يلاحظون ذلك
انجحوا - انجحوا
يا سيدي من قال لك ان الحياة مملة
انت فقط الممل فقط اغفر لنفسك و كن خيرا معها
اتذكر اخر مرة كنت فيها مندفعا مندفعا متحمس للحياة
استرجع هذا الشعور مرة اخري و مارسه في الحياة اليوم و ليس غدا
الان- الان -الان
قم تحرك و ابتسم للحياة اكيد سوف يكون عند الحياة شوية دم و تبتسم لك

صيادية فضة

كانت لي وجهة نظر عندما رايت مسلسل الرايه البيضا و المقارنة بين الموسيقي الشعبية لفضة هي طبعا و الصيادية وبين موسيقي د/ابو الغار و كيف انني اعتقدت انه ليس من الطبيعي ان يوجه الشخص لثقافة بعينها او ان ينظر بدونية الي ثقافة الاخر علي اعتبار ان كل فن هو قيمة مضافة الي مجموع الثقافة ايا كان نوعها
و لكن لحسن الحظ انني سمعت اغنية نيقولا سعادة الجديدة كوني مرا ايه الرقي و الشياكة في الكلمات لمروان خورى و الالحان و الصوت
و للمصادفة سمعت بعدها اغنية كاريكا قلبي بيسلم عليكي و لا ادري ماذا اسمي ما سمعته حاجة كده غريبة
لحظتها فقط شعرت بما شعر به الدكتور ابو الغار
فعذرا د/ ابو الغار و لتسقط للابد صيادية فضة

يا الحنة يا قطر الندي

يا الحنة يا الحنة يا قطر الندي يا شباك حبيبي يا عيني جلاب الهوي
يا خوفي من امك لتدور عليك لاحطك في شعري يا خويا و اتضفر عليك
يا الحنة الحنة الحنة يا قطر الندي يا شباك حبيبي يا عيني جلاب الهوي
يا خوفي من اختك لتدور عليك لاحطك في عيني يا خويا و اتكحل عليك
يا الحنة الحنة الحنة يا قطر الندي يا شباك حبيبي يا عيني جلاب الهوي
يا خوفي من اهلك لتدور عليك لاحطك في قلبي يا روحي و قفل عليك
يالحنة الحنة الحنة يا قطر الندي يا شباك حبيبي يا عيني جلاب الهوي

الرزق

واذا رايت الرزق ضاق ببلدة
و خشيت فيها ان يضيق المكسب
فارحل فارض الله واسعة الفضا
طولا و عرضا شرقها و غربها

اخشي

واخشي الاذي عند اكرام اللئيم
كما تخشي الاذي اذا اهنت الحر ذا النبل

الكباب الفلاحي

من يومين و انا هافف علي اكل كباب فلاحي انا اعلم ان بعض من يقرا قد يقول اوه ايه ده وده مالوش دعوى خالص بالبيتزا ببروني والفواجرا اللي هي علي فكرة كبدة البط
او التريبيه اللي هي ايضا الكرشة عشان كده ما تغركمش الاسامي و علي فكرة انا و لا يهمني لاسباب عديدة اولا انت عارف يعني ايه كباب فلاحي و ثانيا انت دقت عمايل ايدينا يبقي ما تعرفش انك فايتك حاجة جميلة جدا
و خصوصا بقي لو عملناه زي بتاع ماما حاجة فاملي سيز حاجة كده لها طعم و ريحة و شكل ايه انا عندي قناعة ان طرق ماما في عمايل الاكل تشفي
انا هاقولك علي الوصفة
لحم مفروم +ارزمطحون+كسبرة خضراء
+ثوم+بصل +فلفل اسود+ملح+واه بقي لو فيه شوية فريك درة +ليه
تخلط كل هذه المكونات جميعا ثم تسلق في شوربه سابقة التجهيز حتي النضج ثم تحمر او تشوح او تؤكل مسلوقة مع الشوربة في كل الاحوال تسمي و تاكل وتدعي لنا
سوف تجد نفسك بتعرق و ده عرق العافية
و ترفع للسماء ا يديك و تدعو كما يقول السوريين يارب اطعمتنا من خيرك لا تحوجنا لغيرك
وبالهنا

ريمو

سمعتها تحدثني وهي خلف الكمبيوتر و تنادي باسمي ما تكتبي عني حاجة
ثم بعد لحظة وجدتها تهز يديها في الهواء لا لا احسن بلاش اللي تقولي حاجة مش حلوة
مش عارفة ليه ساعتها نظرت في اتجاهها و انا اعلم انها لا تنظر لي و منشغلة بالكمبيوتر و ملاني شعور مرح تجاهها يمكن لآن نبرة صوتها كانت اشبه بالاطفال عندما يريدون شيئا او ربما لاستغرابي الشديد لفرحتها التلقائية التي نادرا ما اراها حيث انه قد كست نفسها او شخصيتها بزي العاقلة و كنت في كثير من الاحيان اقول لها او عنها انها سوسه
هي فعلا عاقلة و طيبة و لكن تحمل في داخلها احلام كثيرة قد تكون الواقعية الشديدة التي كست نفسها بها قد وأدتها و في كل مرة تأد حلما لها تقول المفروض كده لان الواقع مش بتاع احلام
و بالرغم من ذلك فانا اؤيد تفكيرها في كثير من الاحيان
شاهدناها طفلة و لكننا لم نعرفها لا في فترة المراهقة ولا في فترة الجامعة لم نعرفها الا متزوجة
وجاءت الفرصة عندما انتقلنا للسكن في عمارتها و بالاقتراب اتضحت صفات و اختفت اخري في كل الشخصيات لكن كانت هتفرق لو اهتمتي تعرفينا قبل كده يمكن
من اجمل الاشياء لديها ابنها يوسف الذي لم يتحاوز العامين حاجة كده عسولة عنيه بتتكلم و كفاية لما بيشوف نانسي عجرم بيقول اسمي
لكن مامته لم يسرها هذا فوجدتها تقول لي خلي بالك انه لما بيشوف طلعت زكريا بيقول برضه اسمك و انا عارفة انها متغاظة طبعا فارد عليها و الله كفاية ان نابنا من الست نانسي جانب اما ابنتها جودي فهي صورة مصغرة عن خالتها مي عيون جميلة و شعر ناعم اسود جميل
شوية ريم جدعة
ريمو اديني قولت كل حاجة حلوة

احمد فؤاد ودولا مين

دولا مين و دولا مين
دولا عساكر مصريين
دولا مينو دولا مين
دولا ولاد الفلاحين
دولا مين و دولا مين
دولا الورد الحر البلدي يصحي يفتح
اصحي يا بلدي
دولا خلاصة مصر يا ولدي
دولا عيون المصريين
دولا اخواتنا ودول امانينا
الامل اللي علينا يطل
دولا المجد اللي يعلينا
دولا القوة دولا العز
دولا شاربين من اطهر بز
دولا يا سيدي ولاد الشهداء

الوصية حلال

ليه يا طاقيتي تميلي من علي راسي فكرتيني بالحبيب و انا كنت ناسي
وان رحت و فتوني لاكتبك قاسي
و اجيب مياه البحر بالكاس علي راسي
و اطحن الحجرو الصوان تحت ضراسي
علمت ابني علي سيري علي الطبع راح واخد
و قولت يا ابني لو تشتهي غير الحلو ما تاخد
و ابعد عن الشر يا ابني ليوم تتأخد
و ان مال عليك الزمان لا تميل و لا تاخد
لحسن يعايروني بيك و انا علي السؤال مش واخد
و مركب العطا هي اللي بتعدي
والايد اللي اتعودت دائما تدي يصعب عليها تاخد
يا معلم الصبر هو الصبر يتعلم
و نزلت بحر الغرام و الحب علمني
و دقت طعم الفراق و الهجر علمني
و اللي جراللي من الصحاب علمني
بقي يا معلم الصبر هو الصبر يتعلم
الصبر حير قلوب 100 الف ما اتعلم
ابويا نصحني
و قاللي انا مفصل التوب يكون مسبوك عل قدي
و اشيل الحمل بس من كدي
اوصيك يا ابني و الوصية حلال
اوعي الهوي يطمعك
اصل الطمع بيضر خليك علي مبدأك
و الصبر لو مر فيه طعم الحلال يحلو

جرب

جرب جرب جرب جرب و لا تخف
فالذين صنعوا سفينة نوح كانوا من الهواة
اما المحترفين فهم الذين صنعوا تيتانيك

انتهزوا الفرصة

انتهزوا فرصة الايام فانها لا تطول و لا تفسدوها بالشقاق و الجفاء و النزاع حول اتفه الاسباب و املئوا عيونكم من وجوه الاحباب و الاعزاء فلعلكم لا ترونها بعد حين و ارتفعوا فوق الصغائر لتجعلوا رحلة العمر ابحار فغدا تصل السفينة الي مرفئها الاخير
و يتفرق الركاب فلماذا نفسد علي انفسنا ايام الرحلة القصيرة ولماذا لا نرضي بما سمحت لنا به الحياة
لا ادري اين قرات هذه الكلمات

ايجيبستا كومبوند

فيها ايه لو الحكومة اعطت كل فرد من الشعب مليون جنيه منحة لا ترد واللي عايز يهاجر تتكفل بمصاريف الهجرة وبالاعداد اللي هي عايزاها هيتفضل الناس اللي عايزة تقعد في البلد تكمل عليها و يعيشوا و يتدلعوا فيها و يسموها ايجبستا كومبوند و تبقي بتاعتهم و يملوها خدامين من الفلبين و لو عبده و عثمان عايزكمان يقعد يقعد مش مشكلة
بعد تفكير ليس بالعميق يتعبوا نفسهم ليه و يجيبوا خدامين و ليه برضة يدفعوا فلوس ماهي كومبوند من غير كلفة .

حارسة العقار ( ام رضا)

لم نكن من الذين متعهم الزمان بان يكون لنا حارس عقار او بواب و لكن لظروف انتقلت اسرتي الي منزل جديد و كان عهد سكان هذا البيت الاستعانة ببواب فراينا عددا من البوابين المختلفين
بدءا من الفلاحين القادمين من كفر الدوار و انتهاء بفلاحي الصعيد و شتان بين النوعين ومرورا ببواب اول ما مسك العمارة وقف في طابور العيش اتنشل منه 400 جنيه تاني يوم روح
لكنني انا الان لن اتحدث الا عن ام رضا
بوابة عمارتنا ذات العيون الخضراء و القلب الجامد و اللسان الشديد الوطأة و الظاهر كده انها تتحكم في اقدار العائلة بدءا من زوجها الطيب و المبتسم دائما و مرورا برضا الذي عمل اول مااستلموا العمارة في بنزينة قريبة من و انتهاء بحلمي حاجة كده بريئة و جميلة لم يمرضه الفقر و ام رضا شرسة تشعر انها ليست غلبانة او تحتاج الي احد فقط اعطها فرصة
اخر مشروعاتها انها تشوي الذرة علي الرصيف المقابل للعمارة بعد العصر و تظل تهوي علي الفحم و انا معها اسمع طقطقة الفحم حاجة جميلة
الان فقط الشارع بعد العشاء خافت النور و انا في البلكونه وجدتها هي ورضا تتحدث وتلوح لي
مش عايزة ذرة فاجبتها و انا ابتسم لها الذرة بتاعتك غالية مش كتير 75 قرش ترد و تقولي لأ عايزة واحد و لا اتنين فاشير لها 2 فترد طبعا هو انتي لوحدك لازم الانسة هالة تاخد كمان
و هالة اختي دي حبيبة ام رضا
ام رضا تبيع لي الدرة لكنها تعطيه لهالة ببلاش هدية زي ما بتقول
كل الحوار ده و هي في الشارع و انا في الدور الثالث
نفسي ابقي جدعة كده و لا اخجل من اي شئ ما دام ليس حرام او عيب
اتمني الا يكسرني الفقر او الحاجة ابدا و اللي هيتفلسف و يقول الحاجة مش بس فلوس اقوله تعرف تأخد كرسي و في الشارع اللي هناك ده فيه طراوة روح و اقعد.

ياللي

يا اللي دموعك ( و قرفك و تعبك و زهقك و مابقتش قادر )
لحبايبك قولي ابتسامتك تبقي لمين

اغنية لعبد الوهاب كانت امي كثيرا ما ترددها
ملحوظة
( وقرفك و تعبك و زهقك و مابقتش قادر )
دي من عندي انا

حرامي الرغيف لبيرم التونسي

فكرت مرة اني اعمل مدونه سياسية و لكن لان الواحد عنده قولون عصبي فمقدرتش غير ان اكتفي بهذه القطعة لبيرم التونسي فيها كل اللي نفسي فيه سياسيا
تسرق رغيف عيش يا حرامي وتتحبس شهرين
لو كنت قاضي المدينه لاحبسك سنتين
لان ذنبك يا مجرم يعتبر ذنبين
المهنة رخصتها لما سرقت رغيف
و سرقت من قبل ما تصبح وجيه وشريف
لا انت حرامي تشرفنا لا ولاانت وجيه
وياويله ما اتعسه الواقف بين بين
تهجم علي السرقة ليه يا اجهل الجهال
رئيس قلم حضرتك و لا مدير اعمال
السرقة يا ابن الحلال صنعة و عايزة رجال
لهم في فض المشاكل و الامور تصريف
ومن وراهم ضهور جامدة و جنس لطيف
بيهونوا اللي جري و يلطفوا تلطيف
وفين تروح بالرغيف جنب الاكابر فين

الراجل

و بالهدوء و الروية و التعقل تحصلين علي مبتغاك و تنالين المراد و لا تضيعين حقوقك
بالزعيق و الصراخ تلقي روحك ورغم صحة حقك داخل قفص الاتهام و اللوم
نافقيه يا اختي
الراجل طاووس بالونه مهدلة طالبة منفاخ انفخيه يا اختي
الراجل موته و سمه الصوت العالي
كلمات قراتها لسناء البيسي
وخاصة انه راحت رجال العز و الهيبة و بقت رجال ما تستحي العيبة
واللي فيه حيل و نفس ينفذ بقي

بلد حبيبي

وقفت فوق السطوح كل البلاد بانت
لحد بلد حبيبي و دمعتي سالت
حبيبي لابس بنش و فو ق البنش بالطو
من يوم ما خدتك يا..... و الحب بطلتوا

ما تلونيش خدودك

دائما كان ما كانت امي تشبهني بابي وعائلته وكان هذا لا يطربني كثيرا ( مع انهم زي القمر ) يمكن لانني كنت ارتاح لاهل ماما كثيرا نظرا لانهم هنا في الاسكندرية معنا او يمكن لان اهل ابي من الارياف ولم يكن يرضيني ان اكون شبههم يمكن .
وبعد سنوات اتت سنوات عجاف وجدت من يقول انني تغيرت وانني اكاد اشبه عائلة امي
هذا الخبر لم يسعدني كثبرا بل لم يسعدني مطلقا اولا
لانها كانت سنوات عجاف اوي و ثانيا لانني كنت احمل كنزا لا اعرف اهميته وهو ملامح ابي و عمتي وجيهة عيون جميلة و مشاعرها اجمل
يعني ايه انا شكلي اتغير لا بقي انا لسه شبه بابا و ماليش دعوة و اللي مش عاجبه براحته
يعني عايزين الواحد ينسي ماما لما كانت بتغني لي اغنية محرم فؤاد
ما تلونيش خدودك ما تلبسيش حلق ده انت كده بطبيعتك من اجمل ما خلق
ايه اللي حصل و خلاني اتغير حتي عيوني يا عم علي

كلام قرايته عن الكدب

ولا كل من لف العمامة يزينها
ولا كل من ركب الحصان خيال
الدنيا فيها ناس كتير عايزينها
و ناس قليلة ما تتاقلش بمال
ولا كل مين خبط عليك بيودك
افتح عنيك شوف اللي واقف ضدك
ياما الحنان بيخبي نار وقساوة
حاسب يعميك الهوي و يشدك
الكدب راكب علي الحصان متعافي
والصدق لابس خيش وواقف حافي
يا هل تري تقدر تمييز بينهم
ولا ياعيني هتهربي و تخافي
الكدب فارس ده زمانه ووقته
فاتح مدارس يحكي فيها حداقته
ما تشتكوش ياللي الشاكوش علي راسكو
كان ايه خرسكوا ولا ليه صدقتوا
الكدب خيبة بس خيبة قويه
والقوة تعمل لك كيان و هوية
مين اللي يكسب ناس قويه و ظالمة
و لا الحقوق الضايعة و المنسية

مي

بين الغيوم يجوب اجواء الفضاء طير يشق عباب الكون في اشتهاء

حتي اتي يوم احاط به البلاء

سقط الجناح وضاع في القلب الرجاء

لكن قلب الطير لم يبغ العزاء

و لم تذق عيناه من دمع البكاء

فالنمر لا ينحني و ان ذاق الدماء

و النسر لا يبكي وان حرم السماء

كلمات كتبتها لي مي بنت خالتي في فترة سابقة لا ادري هل كنت اشبه النسر في ذلك الوقت ام انها ارادت لي ان اشبهه و احلق مرة اخري علي العموم انا باحاول ولا هي كانت مجرد كلمات اعجبتها يمكن

و الان تحتاج مي كلمات مشجعة مثل هذه الكلمات

ولها اهدي هذه الكلمات

الكلمة الطيبة صدقة

يا عم كلمة باطل تجبر الخاطر

سمعت النكتة دي

خسيس قال للاصيل تعالي عندنا خدام
تاكل و تشرب و تبقي من جملة الخدام
ضحك الاصيل
و قال عجبي عليك يا زمان
حوجتني للخاين واللي ما لهوش امان
انا اطلع فوق جبل عالي تاكلني حدا وغربان
و لا يقولوش الاصيل عند الخسيس خدام

دنيا ( عبد الرحمن الابنودي)

دنيا ردية و رابطة للاصيل علي طول

ومقدمة الندل ماشية مع الردي علي طول

كذاب يا اللي تقول الدنيا دايمة لي

ابكي علي الحي و لا ابكي علي اللي مات

انا بابكي علي رجل كان شجرة علي اللمات

النذل عايش علي الدنيا قد ما عاش كأنه مات

السبع لو مات هتفضل ذكراه علي طول

قول يا رب (سامية الاتربي)

في عز البرد و صهد الحر يطلع من بيته في وش الفجر معاه قفص او زكيبة او عربية تعبانة افني عليها الدهر
مكتوب عليها بخط ديواني بايد خطاط مالهوش تاني
الصبر
ضحك و طل لي حتة طلة
يا ست النبي عربي و الامة عربية
مالي انا و اللغة الافرنجية مولود في سوق الثلاثاء
و نظرتي للحياة هي 3 كلمات
خليها علي الله
بصيت له في دهشة عميقة و مشيت من سكات وانا بافكر في ال3 كلمات

لا نجوت ان نجا

قامت الي جاراتها حزينة
و تقول
ارايتم هذا الفتي
قد مشي ما عرجا (لم يلق عليهاالتحية)
اتراه لم يذق الهوي
لا نجوت ان نجا

اليك فقط

اليك فقط سأكتب شيئا جديدا
سطرا لم يقرأه الي الان احدا غيرك
من قال ان كل الكلام قد كتب من قال ان كل الكلام قد قيل
اليك فقط اكتب كلاما لم يكتب و لم يقال
هنا في عيني انظر
تجد كل الكلام الذي لم يقال
في عيني تجد كل الجديد تجد كل الجميل

يقولون اني

يقولون عنك ... يقولون عني
ماذا يقولون
يقولون انك يقولون اني
يقولون انك انت الوحيد
انت الانيس
انت الوميض لعين ناحت حتي اشتد الوجيب ...انت
الوميض لعين سها عنها الحبيب
انت الوميض لوجه تغضن منه الجبين .... انت الوميض
لقلب ثليج لقلب حزين
انت الوميض لقلبي انا
يقولون عني ماذا يقولون
يقولون اني و اني و اني
وانا لست كأني و اني
ما انا
الا رنين فرح في لحن حزين
و لكنهم يقولون
و مازالوا يقولون
اني و اني
حتي لآشعر اني واني واني واني

الموقن و الشاك( ابو حيان التوحيدي)

لم صار اليقين اذا حدث و طرأ لا يثبت و لا يستقر و الشك اذا عرض ارسي و ربض ؟
يدلك علي هذا ان الموقن بالشئ متي شككته نزا فؤاده و قلق به
و الشاك متي وقفت به و ارشدته و اهديت الحكمة اليه
لا يزداد الا جموحا و لاتري منه الا عتوا و نفورا .

الغريب ( ابو حيان التوحيدي)

الغريب من غربت شمس جماله
واغترب عن حبيبه و عذاله
و اغرب في اقواله و افعاله
وغرب في ادباره و اقباله
و استغرب في طمره و سرباله
يا هذا الغريب من نطق وصفه بالمحنة بعد المحنة
الغريب من ان حضر كان غائبا و ان غاب كان حاضرا
الغريب من ان رأيته لم تعرفه و ان لم تره لم تستعرفه.

الجدل( ابو حيان التوحيدي )

لم يأت الجدل بخير قط
و قد قيل من طلب الدين بالكلام ألحد
ومن تتبع غرائب الحديث كذب
و من طلب المال بالكيمياء افتقر
و ما شاعت هذه الوصية جزافا بل بعد تجربة كررها الزمان و تطاولت عليها الايام
يتكلم احدهم في مائة مسألة و يورد مائة حجة ثم لا تري عنده خشوعا و لا رقة و لا تقوي و لا دمعة
و ان كثير من الذين لا يكتبون و لا يقرءون و لا يفضلون خير من هذه الطائفة
و الين جانبا واخشع قلبا و اتقي لله عز و جل
و اذكر للميعاد و ايقن بالثواب و العقاب .

انت لست تافه

كلمات قراتها للعقاد و جعلتها لي مبدأ طوال حياتي الجامعية فافادتني و لا اعرف كيف تاهت مني و عني
لا تشعر لحظة واحدة انك تافه , فقط انك مبتدئ
لا تشعر لحظة واحدة انك حقير , انت صغير فقط
و انت لست صغيرا
انت قصير العمر
قصير اليد
قصير النظر
و لكن عظيم جبار بعقلك و طموحك و تساؤلاتك عن هذا الكون و خالق الكون و نهاية الكون
انت الكائن الوحيد الذي اذا نزف فانه ينزف علامات استفهام و تعجب

يوم

الجبرتي قال و عنده حق :
رب يوم بكيت منه
فلما صرت الي غيره بكيت عليه


وياريته كان يوم واحد

ليلي حسين

ليلي حسين
في احيان كثيرة اكتب علي مراسلاتي هذا الاسم هو ليس اسمي
و لكنه حلم
ليلي حسين هو اسم مركب مأخوذ من رواية مصرية للطفية الزيات ( الباب المفتوح) هي ليلي و هو حسين عامر
هي ليلي الفتاة الجميلة التي تحمل الكثير من الاحلام و الامال و التطلعات التي تحبطها دائما صدفة او لقاء او كلمة وكما جاء في الروايه " كانت تتكلم في تحفظ و تضحك في تحفظ و لاتغضب ولاتتحمس و كأنها فقدت القدرة علي الغضب و التحمس و عندما كانت كذلك كانت كل تحركاتها و كأنها تعتذر عن وجودها
لماذا لا تستطيع ان تقف علي قدميها مثل بقية الناس
لماذا لا تلطم من يلطمها و تستأنف المسير" ولكن دائما هي تحلم و لاتتوقف عن الحلم
اما حسين فلم يكن لها حبيبا بقدر ما كان هو يد القدر التي ارسلت اليها لا لتقع في غرامه فقط و لكن ليبسط لها يده و يسحبها معه من السماء الي الارض نعم من السماء الي الارض و ليس بالعكس من شتات الاحلام الي الواقعية الايجابية الجميلة ذات النتائج التي تسعد خلق الله
السماء التي نعرفها ما هي الا نجوم وقمر و شمس و ليل و نهار
اما الارض التي نعرفها فهي الناس و الزرع و الورد و العمل و الام و الاب و العيلة و المراجيح و القضيه و الهدف و الحلم و العلم و الشفاء و الذهب و البحر و العصافير و السفن و كل حاجة احنا بنحبها هنا هنا علي الارض الارض فيها ابداع الانسان كله
لهذا عندما اراد لها حسين ان تبدع سحبها معه من الفضاء و انزلها لتمشي في الارض و شوارعها و جعلها تعيش مع الناس و بالناس
مثلها انا ليلي الاخري ليلي هذا العصر و لكني الي الان مازلت ابحث عن حسين عامر فدائي نكسة67 لا ادري هل سأفرح بمقدمه ام اراه لن ينفع في نكسة2008.

زوزو

لا تبكي يا عين علي اللي باع
ولا اللي راح لا
ولا اللي قلبه حجر
لا ولا اللي قلبه جراح
اصبر و قاسي يا قلبي و هني الناس بالافراح

مصر و الاكتئاب

انا مصر عندي احب و اجمل الاشياء
بحبها بعنف و برقة وعلي استحياء
واشتمها و العن ابوها بعشق زي الداء
و اسيبها و اهرب في درب و تبقي هي في درب
وتلتفت تلاقيني جنبها في الكرب


علي فكرة اللي قال الكلام الجميل ده مات من الاكتئاب من فعل نبت مصر الجميل ( اولادها)

يا عم بلا قرف

ده اللي يبيعك بالمال انت ببلاش بيعه
و لو جاب معاك تمن التراب بيعه

سواق الاتوبيس

حسن سلطان ابو العلا
يكفي نور الشريف هذا الفيلم ليدخل الي القلب من اوسع ابوابه من اول مشهد الي المشهد المفضل لدي عندما كان حسن يضرب حرامي الاتوبيس انا لا ادري عن غيري و لكني كنت معه اضرب كل الشر اللي حوالينا بكل صفعة و لطمة علي وجه اللص وجدتني معه اضرب كل حراميه العمر و و حرامية الاماني و حرامية الحلال و الحرامية تحت كل مسمي و اي مسمي واقول زي ما قال حسن
يا ولاد الكلب
يا ولاد الكلب
يا ولاد الكلب
يا ولاد الكلب

كله يدلع نفسه

كنت بأقول لهاانتي ليه كل حاجة فيكي مبالغ فيها اللبس و الشعر و المكياج ( ساعات) فوجدتها تنظر لي و تقول لي انه بعد ان فقدت والدها فانها لم تجد احدا يهتم بها او يعطف عليها ووجدت انها غير مهمة لدي الكثير من افراد عائلتها فماذا تفعل و هذا بنص كلامها مالقيتش حد يدلعني و لما مالقيتش حد يدلعني انا مش هأحزن ولا هاركن جنب الحيطة زي الغلابة انا هادلع نفسي و قوي كمان مش الدلع العادي لا كل الدلع اللي انا نفسي فيه كل دلع الام و الاب و الخال و العمة انا هأدلع نفسي
ساعتها بس حسيت ان عندها 1000 حق
لما ما تلقيش حد مهتم انه يدلعك دلع نفسك و قوي كمان

في دي اوعي تفتح عينيك

في احدي المرات تضايقت احدي صديقاتي من الاسباب التي اسوقها عندما يأتي لي احد العرسان وذلك سواء عندما اراه او لا اراه , فوجدتها تشير لي بالمحسوس كده الي انه المفروض ان اوافق لاسباب كثيرة اهمها ان اللي في سنك عندهم بدل العيل 4
تاني هذه الاسباب هو انتي كل ما شفت عريس تطلعي فيه القطط الفطسانه ما توافقي يا ستي يعني انت عدلة قوي .
هو انت يعني هتفتي فيه( و لمن لا يعرف يعني ايه تفتي معناها يعني تعملي فيه فته او اعتقد تعملي منه فته )
فاجدني اضحك منها و اقول لها لا يا فالحةانا مش هافت فيه انا هأتجوزه .
فيتحول وجهها الي شوية جد و تقولي بصي بقي خدي النصيحة دي نصيحة خبير
يا بنتي لما تدخلي و تشوفي اي عريس ابقي غمضي عنيكي لحد ما تتجوزي , فاضحك انا منها ومن كلامها ثم اقول لها و انتي يا فالحة غمضتي عنيكي فترد طبعا غمضت عنياامال اتجوزت ازاي , فاسالها طيب و فتحتي عنيكي امتي فتضحك بصوت عالي و تقول لي لا يا قمر انت تفضلي مغمضة علي طول.