هما و احنا

هما مين واحنا مين ......؟
هما الامراء و السلاطين
هما المال و الحكم معاهم
و احنا الفقرا المحرومين
حزر .. فزر
شغل مخك
شوف مين فينا بيحكم مين


احنا مين و هما مين
احنا الفعلا و البنايين
احنا السنة و احنا الفرض
احنا الناس بالطول و العرض
من عافيتنا تقوم الارض
و عرقنا يخضر بساتين
حزر فزر شغل مخك
شوف مين فينا بيخدم مين

هما مين و احنا مين
هما الامراء و السلاطين
هما الفيلا و العربية
و النساويين المتنقية
حيوانات استهلاكية
شغلتهم حشو المصاريين
حزر فزر شغل مخك
شوف مين فينا بياكل مين
احنا مين و هما مين


احنا قرنفل علي ياسمين
احنا الحرب حطبها و نارها
و احنا الجيش اللي يحررها
و احنا الشهداء بكل مدارها
منكسرين او منتصرين
حزر فزر شغل مخك
شوف مين فينا بيقتل مين


هما مين و احنا مين
هما الامراءو السلاطين
هما مناظر بالمزيكا
و الزفة و شغل البوليتيكا
و دماغهم طبعا استيكة
بس البركة بالميادين
حزر فزر شغل مخك
شوف مين فينا بيخدع مين

هما مين و احنا مين
هما الامراء و السلاطين
هما بيلبسوا اخر موضة
و احنا بنسكن 7 في اوضة
هما بياكلوا حمام و فراخ
واحنا الفول دوخنا و داخ
هما بيمشوا بطيارات
واحنا نموت بالاوتوبيسات
هما حياتهم بمبي جميلة
هما فصيله و احنا فصيلة


حادي يا بادي يا عبد الهادي
ياللي عليك قصد الغنوة دي
لما الشعب يقوم و ينادي
ياحنا ياهما في الدنيا حزر فزر
شغل مخك شوف مين فينا هيغلب مين

احمد نجم