قوم يا شهيد أكتوبر قولي علشان مين كان استشهادك
كان علشان الأرض اتباعت و اتباعت تربة أولادك
كان علشان المجد الظلمة باعوا في مصر تاريخ أمجادك
كان علشان مصر المحروسة قلعت ملط في حفل مزادك
قوم يا شهد أكتوبر قابل جرحي الحرب اللي مواعدينك
بعد ما أصبح نصرك سلعة بيتاجروا بيها ناس بايعينك
تاجروا بلحمك تاجروا بعضمك تاجروا حتى في ملك يمينك
دمك أصبح غاز بنبيعه و بإرادتنا لناس دبحينك
قوم يا شهيد أكتوبر كدب اللي يقول في هواها يفوقك
قوم دول باعوا مصر حبيبتك يوم ما باعوا لنا الوهم في سوقك
قوم خد حقك من اللي خانونا لأجل الدم ما يملا عروقك
لأجل إن جيت تستشهد تاني تاخد منهم كل حقوقك
قوم يا شهيد أكتوبر و افهم إن جميلك راح لولا دهم
قوم هات كل إخوانك و اصحي لأجل يغيروا من استشهادهم
قوم دول عملوا دمك ميه اللي مسطر كل أمجادهم
قوم دول ضحكوا عليك و كلوها لما قالو لنا مصر بلدهم
قوم يا شهيد أكتوبر و ادفع دمك للي صحيح يفديك
قوم دول باعوا وسامك خردة للي بيدفع من أعاديك
قوم علشان اصغر أحفادك باخد أيديك و يوريك
إن في مصر بلدنا الظلمة باسم الشعب متاجرين بيك
عقيد مهندس بالمعاش
محمد إبراهيم أبو عصفور
احد مقاتلي حرب أكتوبر
محمد إبراهيم أبو عصفور
احد مقاتلي حرب أكتوبر
ليست هناك تعليقات:
إرسال تعليق